არმან ცარუკიანი დიდი ხანია, რაც “მატადორსა” და მის საჩემპიონო ქამრებს უმიზნებს.
უკვე ოფიციალურად დადასტურდა, რომ UFC-ის სომეხი მებრძოლი, არმან ცარუკიანი ილია თოფურიასა და ჯასტინ გეიჯის ბრძოლას დააზღვევს, ანუ ე.წ. “Backup” იქნება. ამაზე თანხმობა ილია თოფურიამაც განაცხადა და თავად არმან ცარუკიანმაც.
UFC 250-ის ფარგლებში, რომელიც თეთრ სახლში შედგება, თოფურიასა და გეიჯის ბრძოლა ცენტრალური მოვლენაა. ბუნებრივია, რომ ორგანიზაციამ მის დაზღვევაზე იზრუნა და ნამდვილად დამაინტრიგებელი მებრძოლი იშოვა ამისთვის.
არმან ცარუკიანმა ამ სტატუსზე თანხმობა განაცხადა. ის მაისიდან აქტიურ ვარჯიშს განაახლებს და ეცდება, რომ წონა დააგდოს. თუ ბრძოლას ოფიციალურად არ მიიღებს, ის აწონვაზე არ გავა, რადგანაც არ უნდა სხეული ტყუილად დატვირთოს – მხოლოდ იმ შემთხვევაში, თუ ამის საჭიროება დადგება.
ჯასტინ გეიჯიცა და არმან ცარუკიანიც უკვე წლებია, რაც ილია თოფურიას მიმართ შეურაცხმყოფელ ინტერვიუებს არ ერიდებიან და ბუნებრივია, რომ ილიას ორივეს განადგურება სურს. თუ გეიჯს რაიმე მოუვიდა ან გადაიფიქრა, მაშინ მისი შემცვლელიც არანაკლებ საინტერესო მეტოქე იქნება.
ამასთანავე, არმან ცარუკიანმა პირობა მიიღო, რომ თუ ბრძოლაში ჩაბმა ამჯერად არ მოუწევს, მისი სახელოვანი ბრძოლაც მალე შედგება. დიდი ალბათობით, გეიჯისა და თოფურიას შორის გამარჯვებულს სამომავლოდ სწორედ სომეხი მებრძოლი შეხვდება.
ქართველ გულშემატკივრებში უკვე გაჩნდა სურვილი, რომ გეიჯი ჩაეხსნას და ილია თოფურიამ არმან ცარუკიანი მაგრად ცემოს იმ სიტყვების გამო, რაც არაერთხელ ამოუშვა. თუმცა გეიჯიც არანაკლებ საცემია – შეიძლება უფრო მეტადაც.
წარმატებები ილია თოფურიას!
