როგორც ჩანს, ტრავმირებულმა სხეულმა ასეთ დატვირთვას ვეღარ გაუძლო.

საქართველოს საფეხბურთო ნაკრები 2 ოქტომბერს ბუდაპეშთში, უნგრეთის ნაკრებთან დამარცხდა. აქედან გუნდი ჩრდილოეთ ირლანდიაში გაემგზავრა, სადაც ბელფასტში ადგილობრივ ნაკრებს დაუპირისპირდება და მიმდინარე ციკლში პირველი გოლის გატანას შეეცდება 5 ოქტომბერს, თბილისის დროით 22:45 საათზე.

სამწუხაროდ, უნგრეთთან გამართულ მატჩში ჯანმრთელობის მდგომარეობა საბოლოოდ გაუფუჭდა ოთარ კიტეიშვილს და გუნდს ბელფასტში არ გაჰყოლია. ოთარი სანაკრებო შესვენებაზეც ტრავმიდან ახალდაბრუნებული ჩამოვიდა და 90 წუთს ვერც ითამაშებდა ვერცერთ მატჩში, მაგრამ როგორც ჩანს, მაინც იმაზე მეტად დაიტვირთა, ვიდრე შეეძლო და სამწუხაროდ, ტრავმაც მიიღო.

ინფორმაციას, რომ კიტეიშვილი ჩრდილოეთ ირლანდიასთან დაგვაკლდება, ფეხბურთის ფედერაციაც ადასტურებს. გუნდი 4 ოქტომბერს მასპინძელ სტადიონზე ერთ მსუბუქ ვარჯიშს გამართავს, ამის შემდეგ კი მწვრთნელი პრესას გაესაუბრება.

წარმატებები საქართველოს საფეხბურთო ნაკრებს!