ყვითელმა წყალქვეშა ნავმა მადრიდიდან კინაღამ 3 ქულა წამოიღო.
გიორგი მიქაუტაძის ვილიარეალი ესპანეთის ლა ლიგის მე-2 ტურის მატჩში მადრიდის ატლეტიკოს გასვლაზე, “ვანდა მეტროპოლიტანოზე” დაუპირისპირდა. დაძაბულ თამაშში ვილიარეალი იგებდა კიდეც, მაგრამ საბოლოოდ ფრე, 2:2 მივიღეთ.
ჩვენთვის მნიშვნელოვანი ის არის, რომ გამორჩეული თამაში ჩაატარა გიორგი მიქაუტაძემ, რომელმაც ძირითად შემადგენლობაში დაიწყო, გოლიც გაიტანა და მოედანი 79-ე წუთზე დატოვა.
პირველი ტაიმი ძალიან უინტერესო გამოდგა, მე-2 ტაიმიდან კი გუნდები ამუშავდნენ. ანგარიში 59-ე წუთზე მარკ პუბილმა გახსნა, აქედან ძალიან მალე, 66-ე წუთზე კი ხერარდ მორენომ პენალტი გაიტანა და ანგარიში გაათნაბრა.
76-ე წუთზე მეკარესთან თითქმის პირისპირ გასულ მიქაუტაძეს რობინ ლე ნორმანმა ხელი უბიძგა და ნორმალურად დარტყმის საშუალება არ მისცა. ამის გამო ლე ნორმანდი მოედნიდან გააძევეს, ობიექტურად დანიშნული თერთმეტმეტრიანი კი მიქაუტაძემ 78-ე წუთზე ზუსტად შეასრულა და მიმდინარე სეზონში თავისი პირველი გოლიც გაიტანა.
სტუმართა სამწუხაროდ, გუნდმა მომგებიანი ანგარიში ვერ შეინარჩუნა და 85-ე წუთზე ჯოვანი სიმეონესგან გოლი მიიღო. საბოლოოდ ფრე, 2:2 მივიღეთ. ვილიარეალმა სეზონის ორივე ტურის მატჩი იდენტური ანგარიშით დაასრულა.
ჟორჟმა ძალიან მაღალი შეფასება, 7.8 დაიმსახურა და მატჩის საუკეთესო ფეხბურთელად დაასახელეს. ჩვენი ნაკრების ფორვარდს პირველ ტურში ასისტი ჰქონდა, მე-2 ტურში კი მადრიდში უკვე გოლიც შეაგდო.
წარმატებები გიორგი მიქაუტაძეს!
