ტიტულის დათმობასთან სულ ახლოს.
ატლანტაში მდებარე მსოფლიოს ერთ-ერთ ულამაზეს სტადიონზე, მიმდინარე მუნდიალის ერთ-ერთი საუკეთესო მატჩი გაიმართა.
Mercedes-Benz Stadium-ზე შეკრებილმა გულშემატკივარმა იხილა ეგვიპტელების გამართული ფეხბურთი, არგენტინის უსუსურობა 79 წუთის განმავლობაში და ფეხბურთის თანამედროვე ისტორიაში ერთ-ერთი გამორჩეული ქამბექი.
სკალონის გუნდი, მიმდინარე ჩემპიონატზე მდევრის როლში პირველად მატჩის მეთხუთმეტე წუთზე, იბრაჰიმის გოლით აღმოჩნდა.
სულ მალე, სრულ შოკში მყოფმა არგენტინამ პოტენციურად მშველელი თერთმეტმეტრიანი მიიღო, რომელიც ანტირეკორდის საფუძველი გამოდგა – მესი, გახდა ისტორიაში პირველი ფეხბურთელი, რომელმაც ერთი მუნდიალის ფარგლებში ორი პენალტი გააფუჭა. გმირი ამჯერად ეგვიპტელთა კიპერი შობეირი გამოდგა.
აღსანიშნავია, რომ ლეოს, მსოფლიოს ჩემპიონატებზე, თერთმეტმეტრიანთა მხოლოდ 50% აქვს გამოყენებული (რვიდან ოთხი).
არგენტინა, 0:2-თან ახლოს 58-ე წუთზე აღმოჩნდა, თუმცა ზიკოს გოლის წინ, ეგვიპტელებმა თამაშის წესები დაარღვიეს.
საბოლოოდ, სკალონის გუნდი ორბურთიან დეფიციტს მაინც ვერ გადაურჩა – ზიკომ, თავისი გოლი მიანც გაიტანა, ამჯერად ჰასანის ასისტით.
უმძიმეს მდგომარეობაში მყოფ ალბისელესტეს ისევ მესიმ უშველა – ლეოს ასისტით, მინიმუმამდე ჩამორჩენა რომერომ დაიყვანა.
ფერზე მოსულმა მოქმედმა ჩემპიონმა, ეგვიპტის კარებზე შტურმი მოაწყო, რაც საბოლოოდ ჯერ მესის გამთანაბრებელი, შემდეგ კი ფერნანდესის გადამწყვეტი გოლებით დასრულდა. შედეგად კი ისტორიული ქამბექი და 3:2, ლეოს და მისი თანაგუნდელების სასარგებლოდ.
გარდა იმისა, რომ მესი, 21 გატანილი გოლით, მუნდიალების ისტორიაში ბომბარდირობის წოდებას ჯერ-ჯერობით ინარჩუნებს, ის საუკეთესო ასისტებითაც გახდა. რომეროზე გაკეთებული შედეგიანი გადაცემა მესის სამუნდიალე კარიერაში მეცხრე აღმოჩნდა. აქამდე, ლეო, რეკორდს მარადონასთან რვა ასისტით იყოფდა.
39 წლის ფეხბურთელისთვის ეს ჯამში 919-ე, ხოლო ნაკრების მაისურით 125-ე გოლი იყო. მატჩის საუკეთესო ფეხბურთელად სწორედ ლეო იქნა აღიარებული.
მეოთხედფინალურ სტადიამდე, არგენტინა, მსოფლიოს ბოლო ექვსი პირველობიდან მეხუთეჯერ გავიდა. ნახეავრფინალის საგზურისთვის, “ალბისელესტე”, შვეიცარიის და კოლუმბიის ნაკრებებს შორის გამარჯვებულთან იბრძოლებს.
