აფრიკელები დაუდევრობისა და აცილებული მომენტებისთვის დაისაჯნენ.
2026 წლის ჯგუფური ეტაპის მე-2 ტურში ერთმანეთს E ჯგუფის ლიდერები, გერმანია და კოტ დ’ივუარი დაუპირისპირდნენ. აფრიკელებმა სამაგალითო პირველი ტაიმი ჩაატარეს და ფრენკ კესის მიერ 30-ე წუთზე გატანილი გოლით იგებდნენ კიდეც, მაგრამ მატჩის დასკვნით ნაწილში ცოტათი აურიეს და დაისაჯნენ. დაახლოებით 60 წუთის განმავლობაში კოტ დ’ივუარი გერმანიის ნაკრებზე უკეთესი გუნდი იყო.
მე-2 ტაიმიდან იდეალურად გამოიცნო ცვლილებები იულიან ნაგელსმანმა. განსაკუთრებით ამირისა და დენიზ უნდავის დუეტმა გაამართლა. შტურგარტის ფორვარდმა ჯერ 68-ე წუთზე გაიტანა ამირის ძალიან კარგი პასის შემდეგ, 90+4 წუთზე კი ფელიქს ნმეტჩას იდეალური გადაცემა დაამუშავა კარგად, სწორად დაარტყა და მატჩს გერმანიის სასარგებლოდ დაუსვა წერტილი – 2:1.
გერმანიის ნაკრები უკვე ოფიციალურად გავიდა შემდეგ ეტაპზე და თანაც დადასტურებულად პირველი ადგილით. ნაგელსმანს საშუალება ექნება მე-3 ტურის მატჩში მთელი შემადგენლობა სრულად დაასვენოს და შედეგზე არ ინერვიულოს.
ამასობაში, იმავე E ჯგუფის წევრებმა, ეკვადორისა და კურასაოს ნაკრებებმა 155 ათასიანი მოსახლეობის მქონე ქვეყნის ისტორია შეცვალა. კურასაომ გაძლო, ფრე 0:0 შეინარჩუნა და ქულა მოიპოვა.
გმირი გამოდგა კურასაოს 37 წლის მეკარე, ელოი როომი, რომელმაც 15 დარტყმა მოიგერია და მხოლოდ 1 დააკლდა ტიმ ჰოვარდის რეკოდრის განმეორებამდე.
კოტ’დივუარს ფრეც კი აძლევს ხელს, რომ ჯგუფიდან მე-2 ადგილით გავიდეს, ეკვადორსა და კურასაოს კი სასწაულები დასჭირდებათ, რათა შემდეგ ეტაპზე ასპარეზობის უფლება დაიმსახურონ.
