კვერნაძემ პირადი ანგარიში უმაღლეს დონეზეც გახსნა.
გიორგი კვერნაძის ფროზინონე ვენეციას სახლში დაუხვდა და ძალიან დაძაბული, რთული მატჩი მივიღეთ. საბედნიეროდ, ქართველი ფორვარდის გუნდმა 3:2 გაიმარჯვა და განსაკუთრებით სასიამოვნო ის ფაქტია, რომ ამაში კვერნაძემ გადამწყვეტი როლი ითამაშა.
ფროზინონეს ძალიან წარმატებული პირველი ტაიმი ჰქონდა და ანტონიო რაიმონდოს დუბლით დიდ შესვენებაზე 2:0 უპირატესობით გავიდა, მაგრამ მე-2 ნახევარში საქმე ისე აღარ წაუვიდათ და 2 გოლი გაუშვეს – ჯერ 66-ე წუთზე ჯონ იებოამ გაიტანა, 74-ეზე კი რიჩი საგრადომ ანგარიში გაათანაბრა. დროის მოკლე მონაკვეთში გაშვებულმა ორმა გოლმა ფროზინონე შოკში ჩააგდო, მაგრამ ამ პრობლემიდან გიორგიმ გამოიყვანა.
ბოლო წუთებში კვერნაძე არც თუ ისე გამორჩეული მატჩის ფონზე ძალიან ფააქტიურდა და რამდენიმე კარგი მომენტი შექმნა. საბოლოოდ, 83-ე წუთზე მეტოქის საჯარიმოში შექმნილი გაუგებრობით ისარგებლა, რიკოშეტით წამოსულ ბურთზე ყველას დაასწრო და გაიტანა. ამით საბოლოო ანგარიში დააფიქსირა და ფროზინონეს სეზონში მე-2 მოგება მოუტანა.
გიორგიმ მატჩი სრულად ჩაატარა, მშობლიურ, მარცხენა ფლანგზე მოქმედებდა და სოლიდური შეფასებაც, 7.2 დაიმსახურა.
წარმატებები გიორგი კვერნაძეს!
